ദ (ലാസ്റ്റ് ) റേപ്പ് - ഒരു പഴയ കവിത

കവിതേ, നീയെന്‍ ഹൃദയത്തില്‍ ലഹരി നിറയ്ക്കില്ലിനി..
നീയെന്നസ്ഥിയില്‍ അമര്‍ത്തിച്ചുമ്പിച്ചാലുമുണരില്ല ഞാന്‍.

എന്നാലും, കൂട്ടിവയ്ക്കുന്നു ഞാനക്ഷരങ്ങള്‍
കുരിശിലേറ്റി കൊല്ലപ്പെട്ടവന്റെ; കുരിശിലേറി മരണം വരിച്ചവന്റെ ഉയിര്‍ത്തെഴുന്നേല്‍പ്പല്ലിത്

ഇതെന്നാത്മ സഖിയെന്‍ നെഞ്ചില്‍ തെളിച്ച മെഴുതിരി വെളിച്ചത്തിലെന്‍
വിരലുകളാടും നിഴല്‍ നാടകം...
ചോരയോട്ടം നിന്നു നീലിച്ചു തളര്‍ന്നയെന്‍ വിരലുകളാടും വെറും നിഴല്‍ നാടകം.

കൂട്ടിവയ്ക്കുന്നു ഞാനക്ഷരങ്ങള്‍..
കനലില്‍ കുരുക്കാത്ത, മഴയില്‍ കുതിര്‍ന്നു തളര്‍ന്നുറങ്ങുന്നയക്ഷരങ്ങള്‍.

ആത്മസഖീ.. നീയറിയുന്നുവോയെന്‍ വേദന?
നീയാണാദ്യമെന്‍ മാനസ വാടിയില്‍ പൂവിരിയിച്ച് പൊന്‍ വസന്തം
എന്നിട്ടും നീയറിഞ്ഞില്ലയീ വേദന.. ബലാത്സംഗം ചെയ്യപ്പെടുന്ന മഞ്ഞപ്പൂക്കളുടെ വേദന!

ആത്മസഖീ.. ഞെട്ടറ്റടര്‍ന്നിതാ വീഴുന്നു
എന്‍ നെഞ്ചിലെ കനലില്‍ കുരുക്കാത്ത,
എന്‍ കണ്ണീര്‍ മഴയില്‍ കുതിര്‍ന്നു തളര്‍ന്നുറങ്ങുന്നയക്ഷരങ്ങള്‍.